Душанбе. 1-уми декабр. ОИ «Азия-Плюс» – Соли ҷорӣ дар майдони «Дӯстӣ»-и пойтахт чорабиниҳои солинавӣ гузаронида намешаванд. Мутобиқи қарори раиси шаҳри Душанбе – Маҳмадсаид Убайдуллоев, соли ҷорӣ гузаронидани шоу-чорабиниҳои анъанавии солинавӣ дар майдони «Дӯстӣ»-и пойтахт дар асоси муқаррароти қонуни ҷумҳурӣ «Дар бораи танзими анъана ва ҷашну маросимҳо дар Ҷумҳурии Тоҷикистон» манъ карда шудааст.
Тавре ба ОИ «Азия-Плюс» сухангӯи раиси шаҳр – Шавкат Саидов хабар дод, аз ин ба баъд дар майдони марказии шаҳр танҳо чорабиниҳои давлатӣ гузаронида мешаванд. «Дар майдони «Дӯстӣ» танҳо гузаштҳои низомӣ ва намоишҳои идона бахшида ба идҳои давлатӣ, инчунин чорабиниҳо ба ифтихори ташрифи ҳайатҳои баландмақоми хориҷӣ ба Тоҷикистон баргузор мешаванд», – гуфт Саидов.
