Душанбе.11-уми декабр. ОИ «Азия-Плюс» – Чанде қабл дар ҷаласаи навбатии Шӯрои ҷамъиятии Ҷумҳурии Тоҷикистон аз саҳми аҳзоби сиёсӣ дар таҳкими истиқлолияти давлатӣ натиҷагирӣ карда шуд.
Директори Маркази тадқиқоти стратегии назди президенти ҷумҳурӣ Сӯҳроб Шарипов дар маърӯзаи худ изҳор дошт, ки саҳми аҳзоби сиёсӣ дар таҳкими истиқлолияти давлатӣ назаррас нест. Номбурда чунин изҳори ақида намуд, ки солҳои ахир давлат ба пайдошавии ҳизбҳои сиёсии нав манфиатдор буд, то фазои холии аз ҷониби ба ном ҳизбҳои созанда ташкилшуда пур гардад.
С.Шарипов мӯътақид аст, ки айни замон фаъолияти ҳизбҳои сиёсӣ, ки худро аҳзоби мухолифи созанда мешуморанд, пурмаҳсул нест. «Онҳо доир ба ҳалли ин ё он масъала пешниҳоди мушаххас надоранд», – гуфт ӯ.
Директори маркази тадқиқоти стратегии назди президенти ҷумҳурӣ афзуд, ки ҳарчанд имрӯз ҳам давлат ба мавҷудияти оппозитсияи воқеан созанда эҳтиёҷ дошта бошад ҳам, ҷомеа дигар ба чунин нерӯҳои заъифи сиёсӣ ниёз надорад.
Раиси Ассотсиатсияи сиёсатшиносони Тоҷикистон Абдуғанӣ Мамадазимов аз парокандагии аҳзоби сиёсӣ изҳори нигаронӣ кард.
