Душанбе. 19-уми декабр. ОИ «Азия-Плюс» – Корхонаи воҳиди давлатии ҳавопаймоии «Tajik Air» чиптаи хатсайри ҳавоии Душанбе-Маскавро арзон кард.
Тавре сухангӯи корхона Назира Давлатова ба ОИ «Азия-Плюс» хабар дод, акнун арзиши чипта ба ин хатсайр 920 сомониро (ҳудуди 200 Евро) ташкил медиҳад ва нархи он ба миқдори 40 Евро кам карда шудааст.
Ба гуфтаи ӯ, чиптаҳоро бо нархномаи нав дар ҳама нуқтаҳои фурӯши чиптаҳои хатсайрҳои ҳавоӣ дар шаҳрҳои Душанбе, Қӯрғонтеппа, Хуҷанд ва дигар шаҳру навоҳии ҷумҳурӣ метавон дастрас кард.
Номбурда афзуд, ки феълан масъалаи кам кардани арзиши чиптаҳо ба хатсайрҳои дигар низ мавриди баррасӣ қарор дорад.
