Хуҷанд. 8-уми январ. ОИ «Азия-Плюс» – Сарраёсати хадамоти давлатии оташнишонии вилояти Суғд аз Чин боз як мошини сӯхторхомӯшкунӣ харидорӣ кард.
Тавре сардори раёсати мазкур Нозим Маҳмадов ба ОИ «Азия-Плюс» хабар дод, ғунҷоиши зарфи оби мошин 6 тоннаву 400 килоро ташкил дода, мошин ҳамчунин бо таҷҳизоти замонавии оташнишонӣ ва лавозимоту асбоби зарурӣ барои ҳайати шахсӣ муҷаҳҳаз гардидааст. Арзиши мошин ба 290 ҳазор сомонӣ баробар аст.
Ба гуфтаи Н.Маҳмадов, ин дуввумин мошини сӯхторхомӯшкуниест, ки аз Чин харидорӣ мешавад ва акнун шумори нақлиёти нав, ки дар навбатдорӣ истифода мешавад, 9 ададро ташкил медиҳад. «Хадамоти оташнишонии шаҳри Хуҷанд бо 4 мошин ва ноҳияҳои Бобоҷон Ғафурову Конибодом ва Истаравшан бо мошинҳои боқимонда таъмин гардиданд», – афзуд ӯ.
