Душанбе. 16-уми январ. ОИ «Азия-Плюс» –
Идораи Швейтсария оид ба рушд ва ҳамкорӣ (
SDC
) ва кӯмаки башардӯстонаи ФОКУС дар ҳамкорӣ бо вазоратҳои маорифу тандурустӣ ва кумитаи ҳолатҳои фавқулодда оид ба амалисозии марҳилаи
II
-уми Ташаббусҳо дар бораи амнияти зилзиланокӣ (сейсмикӣ) дар Тоҷикистон созишнома ба имзо расониданд.
Тавре аз дафтари Идораи Швейтсария оид ба рушд ва ҳамкорӣ (
SDC
) ба ОИ «Азия-Плюс» хабар доданд, иқдоми мазкур ба дастовардҳои лоиҳаҳои амнияти зилзиланокии аз ҷониби созмони ФОКУС дар Тоҷикистон амалишуда асос ёфта, бо мақсади коҳиши осебпазирии аҳолии шаҳрҳои ҷумҳурӣ аз заминларза ва вусъат бахшидан ба корҳои омодагии аҳолӣ ба офатҳои табиӣ сурат мегирад.
Ба иттилои манбаъ, ба гурӯҳҳои мақсаднок омӯзгорону толибилмон, кормандони бемористон, корхонаву муассисот ва аҳолии шаҳрҳои Душанбе, Ғарм, Хуҷанд, Хоруғ, Қӯрғонтеппа ва Кӯлоб шомил мегарданд. Дар ин марҳила баргузории тренингҳо дар мавзӯи вижагиҳои офатҳои табиӣ ва пешниҳоди мавод дар ин хусус ба 50 мактаб, 25 муассисаи тиббӣ, 25 корхонаи давлатӣ ва 17 тренерҳои Тоҷикистон дар назар аст.
