Душанбе. 22-уми январ – Асадулло Раҳмонов, раиси Кумитаи радио ва телевизиони Тоҷикистон ҳушдор додааст, ки агар шабакаи РТР Планета ҳаққи истифода аз хадамоти ширкати “Тоҷиктелерадиоком”-ро напардозад, пахши барномаҳои ин шабакаро дар қаламрави кишвар қатъ хоҳад кард.
Дар иттилои ҳафтаномаи «Миллат» гуфта мешавад, шабакаи РТР Планетаи Русия, ки бо фиристандаҳои Кумитаи радио ва телевизиони Тоҷикистон барномаҳои худро дар Тоҷикистон пахш мекунад, ҳаққи хадамоти ширкати “Тоҷикрадиотелеком”-ро дар се моҳи ахир, ки 150 ҳазор долларро ташкил медиҳад, напардохтааст. Мақомоти Кумитаи радио ва телевизион эълом карданд, ки барои бозпардохти ин қарзҳо барои шабакаи РТР Планета як моҳ мӯҳлат додаанд.
