Душанбе. 19-уми феврал. ОИ «Азия-Плюс» – Кишоварзони мамлакат аз обуҳавои мусоид истифода намуда, фаъолона киштукори баҳории зироати ғалладонагиро идома медиҳанд.
Тавре ба ОИ «Азия-Плюс» аз Вазорати кишоварзии ҷумҳурӣ хабар доданд, то имрӯз аз 135 ҳазор гектари барои соли равон пешбинишуда дар 21,6 ҳазор гектар зироати ғалладона кишт шудааст, ки дар муқоиса бо соли гузашта 13,5 ҳазор гектар зиёдтар мебошад. Қобили зикр аст, ки дар мавсими имсола 90 дарсади майдони киштро заминҳои обӣ ташкил медиҳанд.
Бино ба иттилои манбаъ, киштукор аслан дар ноҳияҳои вилояти Хатлон, Турсунзода, Ҳисор, Шаҳринав ва Рӯдакӣ ҷараён дошта, дар вилояти Суғд феълан ба киштукор омодагӣ мегиранд.
Дар ҳамин ҳол, аз Вазорати кишоварзӣ хабар доданд, ки дар ҳудуди 216 ҳазор гектар кишти тирамоҳӣ гузаронида шуд, ки солҳои ахир яке аз нишондиҳандаҳои баландтарин аст, аммо танҳо 8,5 ҳазор гектари майдони кишт бо нуриҳо ғизо дода шудааст, ки ин нишондиҳанда ҳамагӣ 3,9 дарсади нақшаро ташкил медиҳад.
