Кӯлоб. 25-уми феврал. ОИ «Азия-Плюс» – Дар ноҳияи Темурмалик ба санаи 1-уми январи соли 2009 қарзи пардохти маблағҳо аз рӯи ҳамаи намуди андоз ба беш аз 3,5 млн. сомонӣ расид.
Тавре манбаъ аз нозироти андози минтақаи Кӯлоб ба ОИ «Азия-Плюс» хабар дод, аз ин миқдори қарз 1 млн. 936 ҳазор сомониаш ба 17 хоҷагии деҳқонии ноҳия рост меояд.
Ба иттилои манбаъ, миқдори зиёди қарзи хоҷагиҳо ҳанӯз аз замони табдили собиқ колхозу совхозҳои шӯравӣ ба хоҷагиҳои хурди деҳқонӣ боқӣ мондааст ва хоҷагиҳои навтаъсис имкон надоштанд, ки маблағи қарзҳоро пардохт намоянд. «Аз ҳисоби фоизҳои замгардида барои саривақт напардохтани маблағи пардохти андоз, ки аз миқдори зикргардида беш аз ним миллин сомониро ташкил медиҳад, ҳаҷми қарзҳо афзуд», – гуфт манбаъ.
Зикр гардид, ки раёсати хоҷагии об ва идораи обу корез ба миқдори 215,8 ҳазор ва ширкатҳои гуногуну иттиҳодияҳои ҷамъиятӣ ба миқдори 350,9 ҳазор сомонӣ аз буҷа қарздоранд.
