Душанбе. 25-уми феврал. ОИ «Азия-Плюс» – Аз оғози соли ҷорӣ шумори мусофирон дар қатораҳои мусофирбари КВД «Роҳи оҳани Тоҷикистон» ба хатсайрҳои байнулмилалӣ дар муқоиса бо ҳамин давраи соли гузашта тақрибан 20 ҳазор нафар камтар шудааст.
Тавре аз хадамоти матбуоти Вазорати нақлиёт ва коммуникатсияи ҷумҳурӣ ба ОИ «Азия-Плюс» хабар доданд, дар ин давра шумораи мусофирони ба Тоҷикистон воридгашта 6 ҳазор нафар ва аз Тоҷикистон ба хориҷи кишвар сафаркарда 12 ҳазор нафар коҳиш ёфтааст.
Ба иттилои манбаъ, бар асари кам шудани шумори мусофирон даромади корхона нисбат ба ҳамин давраи соли гузашта ба миқдори қариб 10 млн. сомонӣ камтар гашт.
