Кӯлоб. 24-уми апрел. ОИ «Азия-Плюс» – «Корвони ваҳдат» бо мақсади таблиғи ғояҳои ватандӯстӣ, ки солҳои ахир ба ҳукми анъана даромадааст, вориди Кӯлоб шуд.
Чӣ тавре ки муовини раиси вилояти Хатлон Ҳокиятмоҳ Ҳакимова ба ОИ «Азия-Плюс» хабар дод,ҳайати корвон бо шумули профессор Отахон Сайфуллоев, адибону шоирон Абдулҳамид Самадов, Мирзо Файзалӣ, Ҳақназар Ғоиб ва Хосият Вализода дар донишгоҳи Кӯлоб ва ҷамоати Даҳана бо донишҷӯёну аҳолии маҳаллӣ мулоқот ороста, ба ҳозирин тамоми роҳи тайкардаи кишвар то расидан ба истиқлоли миллиро бо мисолҳои мушаххас ва образҳои бадеӣ шарҳ доданд.
Ҳ.Ҳакимова гуфт, аҳли мулоқот ба назари шоирону адибон оид ба мушкилоти мавҷуда таваҷҷӯҳи хос зоҳир сохта, ба суолоти хеш посухҳои қаноатбахш гирифтанд. «Корвони ваҳдат» сафари худро аз ноҳияи Бохтар оғоз намуда, пас аз шаҳри Кӯлоб ба Вилояти Мухтори Кӯҳистони Бадахшон раҳсипор мегардад ва сипас аз минтақаи кӯҳистон озими вилояти Суғд хоҳад шуд», – афзуд муовини раиси вилояти Хатлон.
