Душанбе. 13-уми май. ОИ «Азия-Плюс» – Имрӯз дар вохӯрии мақомоти раҳбарии вазорату идораҳои бахши иқтисоди ҶТ бо намояндагони созмонҳои мададрасон, ки ба таъсири бӯҳрони молӣ ба иқтисоди Тоҷикистон бахшида шуда буд, вазири молияи ҶТ Сафаралӣ Наҷмиддинов изҳор дошт, ки барои маблағгузорӣ ба амалисозии чорабиниҳои зиддибӯҳронии ҳукумат 180-200 млн. $ маблағи иловагӣ зарур аст.
С.Наҷмиддинов гуфт, маблағгузорӣ ба амалисозии чорабиниҳои зиддибӯҳронии ҳукумат асосан аз ҳисоби воситаҳои давлатӣ ба нақша гирифта шудааст, вале чун имконоти молии ҳукумат маҳдуд аст, ҷумҳурӣ ба ҷалби сармоя аз хориҷи кишвар, аз ҷумла, дастгирии созмонҳои мададрасон умед дорад.
Вазири молия хотирррасон кард, ки пас аз ворид сохтани тағйирот ба қонун дар бораи буҷаи давлатии соли 2009, ҳаҷми даромадҳои буҷа ба андозаи 9,8 дарсад аз нишондиҳандаи қаблӣ (459 млн. сомонӣ) ва ҳаҷми хароҷот ба миқдори 9,6 дарсад (459 млн. сомонӣ) коҳиш меёбанд.
С.Наҷмиддинов зикр кард, ки маблағи созмонҳои мададрасон баҳри дастгирии буҷаи соли 2009 ба 72 млн. доллари ИМА баробар аст. «Аз ин миқдор 20 млн. $ маблағи Бонки ҷаҳонӣ, 40 млн. $ маблағи Бонки рушди Осиё ва 12 млн. $ маблағи Комиссияи Аврупо аст», – афзуд вазири молия.
