Душанбе. 23 май. Азия-Плюс – Рӯзҳои истироҳати ҳафтаи сипаришуда бо ташаббуси вазири мудофиаи Қазоқистон Адилбек Ҷаксибеков дар шаҳри Бишкек вохӯрии кории вазирони мудофиаи Қазоқистону Тоҷикистон ва Қирғизистон баргузор шуд.
Тавре ба ОИ «Азия-Плюс» сардори маркази матбуоти Вазорати мудофиаи ҷумҳурӣ Фаридун Маҳмадалиев иттилоъ дод, зимни мулоқоти вазири мудофиаи Тоҷикистон Шералӣ Хайруллоев бо вазири мудофиаи Казоқистон Адилбек Ҷаксибеков ва Қирғизистон – Абибилла Кудайбердиев масоили баргузории машқу тамринҳои муштарак, роҳандозӣ ва рушди ҳамкориҳои низомиву техникӣ, таъмини амнияти минтақавӣ, омодасозии кадрҳои ҳарбӣ ва табодули маълумоти фаврӣ мавриди баррасӣ қарор гирифтанд. «Ғайр аз ин, Тоҷикистону Қирғизистон бобати дар моҳи июли соли равон дар қаламрави вилояти Ботканд баргузор намудани машқи низомии муштарак ба мувофиқа расиданд», – гуфт ӯ.
Номбурда ҳамчунин гуфт, айни замон шумори техникаву ҷузъу томҳое, ки дар ин машқ ширкат меварзанд, муайян карда мешавад.
