Душанбе. 6-уми июл. «Азия-Плюс» — | Бо ба Тоҷикистон ворид шудани маводи сӯзишворӣ аз рӯйи меъёрҳои нави боҷҳои гумрукии содиротӣ, ки ҳукумати Русия аз 1-уми июли соли равон муқаррар намуд, қимати маводи сӯзищворӣ дар Тоҷикистон коҳиш хоҳад ёфт. Дар ин бора ба ОИ «Азия-Плюс» аз ҶСК «Газпромнефт-Тоҷикистон» хабар доданд.
«Айни замон дар нуқтаҳои фурӯш маводи сӯзишворие, ки мутобиқи меъёри боҷи содиротии моҳи июн ворид гардида буд, фурӯхта мешавад ва табиист, ки бо ворид шудани маводи сӯзишворӣ мутобиқи меъёрҳои нави боҷи содиротӣ, бо назардошти хароҷот, нархи чаканаи маводи сӯзишворӣ низ тағйир меёбад», – гуфтанд дар ширкати мазкур.
Ба иттилои манбаъ, санаи дақиқи ба Тоҷикистон ворид шудани мваоди сӯзишворӣ бо меъёрҳои нави боҷи содиротӣ ҳанӯз маълум нест, вале захираҳои маводи сӯзишвории ширкат алҳол кифоя аст. «Феълан дар нуқтаҳои фурӯши ширкат ба ҷуз бензини навъи АИ-80, ки арзиши он аз 2-юми июл 40 дирам боло рафта, ба 6 сомонӣ расид, нархҳои аз санаи 8-уми июн муқарраршуда бетағйир боқӣ мондаанд. Феълан бензини навъи АИ-92 – 6,30, АИ-95 – 6,40 ва АИ-98 – 6,1 сомонӣ арзиш доранд», – гуфт сарчашма.
Ёдрас мекунем, ки Русия аз 1-уми июл меъёри боҷи содиротӣ ба маҳсулоти нафтии сафедро барои 1 тонна аз 309,6$ то ба 298,2 $ поин бурд. Боҷи содиротӣ барои 1 тонна бензин мутаносибан аз 415,8$ то ба 400,5 $ коҳиш ёфт.
Бино ба маълумоти Хадамоти гумруки назди ҳукумати ҷумҳурӣ, дар зарфи 5 моҳи соли ҷорӣ ба Тоҷикистон ҳудуди 200 ҳазор тонна маводи сӯзишворӣ ворид гардидааст, ки 180 ҳазор тоннааш ба Русия рост меояд.
