Душанбе. 6-уми июл. «Азия-Плюс» — | Миёни кишварҳои узви Иттиҳоди Давлатҳои Мустақил Тоҷикистону Белорус аз ҷиҳати афзоиши сатҳи таваррум пешсафанд.
Бино ба маълумоти Кумитаи байнидавлатии омори иттиҳод, дар моҳҳои январ-майи соли ҷорӣ нархҳои истеъмолӣ дар Белорус ба андозаи 25,4 ва Тоҷикистон ба миқдори 6,9% боло рафтаанд. Дар Қирғизистон ин нишондиҳанда ба 6,5% баробар аст.
Дар ин давра ҳаҷми болоравии нархҳои истеъмолӣ дар кишварҳои дигари узви ИДМ ба таври зайл аст: Украина – 5,5, Арманистон – 5, Молдова – 4,9 ва Русияву Қазоқистон – 4,8%. Дар Озарбойҷон дар ин давра сатҳи пасттарини тавррум ба қайд гирифта шудааст, ки он ба 3,4% баробар аст. Таври маъмулӣ дар бораи ин нишондиҳандаҳо нисбат ба Ӯзбекистону Туркманистон маълумот дода намешавад.
Дар моҳҳои январ-майи соли равон сатҳи миёнаи таваррум дар кишварҳои узви ИДМ 5,8%-ро ташкил дод. Дар ҳамин давраи соли гузашта афзоиши нархҳои истеъмолӣ дар кишварҳои узви ИДМ ба ҳисоби миёна ба 3,9% баробар буд.
Оғози соли равон ҳукумати Тоҷикистон нигоҳдории сатҳи таваррум дар бахши истеъмолиро ба андозаи 7% ба нақша гирифта буд. Аммо бо болоравии маблағи боҷи содиротии Русия ба маҳсулоти нафтӣ, арзиши маҳсулоту хизматгузориҳо дар Тоҷикистон боло рафт.
