Душанбе. 26-уми август. «Азия-Плюс» — Дар пойтахти Тоҷикистон – шаҳри Душанбе бо иштироки сарвари давлат Эмомалӣ Раҳмон маросими ифтитоҳи муҷассамаи Нишони давлатии Ҷумҳурии Тоҷикистон баргузор шуд.
Баландии муҷассама 45 метр ва паҳнойии он 5 метрро ташкил медиҳад. Ба оғози сохтмони иншооти мазкур моҳи ноябри соли гузашта президенти мамлакат ҳусни оғоз бахшида буд.
Муҷассамаи Нишони давлатии Ҷумҳурии Тоҷикистон дар маркази шаҳри Душанбе дар паҳлӯи чапи Кохи Миллат қомат барафрохт. Дар паҳлӯи рости Кохи Миллат поягоҳи баландтарини 165-метра дар дунё бо парчами миллӣ бунёд гардид, ки маросими расмии ифтитоҳи он ахири моҳи равон баргузор мешавад.
Ахири моҳи майи соли равон амали санҷиши техникии бардоштани поягоҳи парчами миллӣ сурат гирифт. Паҳноии парчам дар фазои пойтахти Тоҷикистон 30 метр ва дарозии он 60 метрро ташкил медиҳад.
Қабл аз ин поягоҳи баландтарини парчами миллӣ дар пойтахти Озарбойҷон – шаҳри Боку гузошта шуда буд, ки 162 метр баландӣ дорад.
