Котиби давлатии Иёлоти Муттаҳидаи Амрико Ҳилларӣ Клинтон ба Афғонистон ташриф овард.
Хабрагузории Лента.ру бо истинод ба Agence France-Presse иттилоъ медиҳад, ки ҳавопаймои ӯ рӯзи 19-уми октябр, соати 21:15 дақиқа бо вақти маҳаллӣ ба шаҳри Кобул фуруд омадааст.
Як манбаъ аз Департаменти давлатии ИМА ба AFP хабар додаст, ки дар барномаи сафари Клинтон ба Афғонистон гуфтушуниди ӯ бо президени Афғонистон Ҳомид Карзай дар назар аст.
Гуфта мешавад, ҳадафи аслии сафар дарёфти воситаҳои «танзими диломатӣ»-и вазъ дар Афғонистон аст, ки Клинтон зарурати онро қаблан изҳор карда буд.
Клинтон ба Афғонистон пас аз як моҳи марги собиқ президенти ин кишвар, раиси Шӯрои олии сулҳи Афғонистон Бурҳониддин Раббонӣ омад. Бурҳониддин Раббонӣ масъули баргузории гуфтушунид бо мақомоти раҳбарии ҳаракати «Толибон» буд.
Пас аз марги Раббонӣ гуфтушунидҳо бо ҳаракати «Толибон» қатъ шуданд. Намояндаи Департаменти давлатии ИМА гуфтааст, дар ҷараёни гуфтушуниди Клинтон ва Карзай масъалаи гуфтушунидҳо оид ба сулҳ бо ҳаракати «Толибон» низ баррасӣ мешавад.
Бино ба маълумоти расида ба ОИ «Азия-Плюс», интизорӣ меравад, ки пагоҳ Ҳилларӣ Клинтон аз Тоҷикистон боздид намуда, рӯзи 22-юми октябр ба Тошканд меравад.
