Намояндагони Вазорати корҳои хориҷии Эстония рӯзи 27-уми октябр бо ҳамтоҳои худ аз Вазорати корҳои хориҷии Тоҷикистон дар тамос шуданд, то ки ҷузъиёти масъалаи ҳабси шаҳрванди ин кишвар, халабони ҳавопаймо Алексей Руденко дар Тоҷикистонро баррасӣ кунанд.
Ғайр аз ин, Эстония расман ба сафоратхонаи Олмон дар шаҳри Душанбе муроҷиат карда, дархост намудаааст, ки ҳарчи зудтар барои вохӯрӣ як дипломатро сафарбар созад.
Дар ин бора ВАО-и интернетӣ бо истинод ба ВКХ-и Эстония хабар медиҳанд.
Рӯзи 26-уми октябр ҷиҳати кумак ба вазорати мазкур хешовандони халабони ҳабсшуда муроҷиат кардаанд.
Чанде қабл намояндагони вазорат бо намояндагони ВКХ-и Тоҷикистон ва сафоратхзонаи Олмон дар Тоҷикистон дар тамос шуданд, то ки дар бораи боздошти шаҳрванди Эстония дар қаламрви Тоҷикистон маълумоти муфассал дастрас намоянд. «Вазорати корҳои хориҷӣ аз консули сафоратхонаи Олмон дархост кард, ки ҳарчи зудтар бо халабони ҳабсшуда мулоқот кунад. Тоҷикистон ба ҳабсшуда адвокат таъин кардааст», – хабар додаст ВКХ.
Сафорати Эстония дар шаҳри Маскав бо намояндагони ВКХ-и Русия ва сафоратхонаи Русия дар Тоҷикистон низ дар ин хусус гуфтушунид кардаанд. «Ҳамчунин зимни зарурат Эстония омода аст, ки дипломатии худро аз сафоратхона дар Қазоқистон ба Душанбе сафарбар намояд», – гуфтаанд дар вазорат.
Ёдрас мекунем, ки ба Алексей Руденко 13 соли зиндон таҳдид мекунад. Ҳамроҳи ӯ шаҳрванди Русия Владимир Садовничий низ дар маҳбас қарор дорад.
Ҳавопаймоҳое, ки таҳти идораи Садовничий ва Руденко қарор доштанд, барои ба Афғонистон расонидани маҳсулот ва борҳои гуманитарӣ истифода мешуданд.
Моҳи марти соли 2011 ба халабонони ҳавопаймоҳо супориш дода шуд, ки фурудгоҳи шаҳри Кобулро тарк созанд. Бо дастрасии иҷозат барои парвоз ба Тоҷикистон, онҳо ба самти фурудгоҳи шаҳри Қӯрғонтеппа роҳ пеш гирифтанд.
Пас аз фуруд омадан дар фурудгоҳи шаҳри Қӯрғонтеппа Садовничий ва Руденкоро ба ҳабс гирифта, онҳоро дар убури ғайриқонунии марзи давлатӣ, риоя накардани қоидаҳои парвозҳои байнулмилалӣ ва қочоқ муттаҳам донистанд.
