Соли гузашта дар минтақаи Кӯлоби вилояти Хатлон 4,2 млн. сомонӣ маблағҳои буҷетӣ, ки ба сохторҳои давлатӣ, корхонаву ташкилот ва муассисаҳо ҷудо шуда буданд, азхуднашуда боқӣ монданд.
Дар нишасти хабарӣ сардори Раёсати минтақавии молияи Кӯлоб Иззатулло Давлатов дар робита ба ин масъала изҳор кард, ки чунин ҳолат ба даҳҳо сабабҳои объективӣ марбут буда, вале метавон гуфт, ки ба ин воситаҳои пулии ҷудошуда талаботи асоснок пайдо нашуд ва ин маблағ ба буҷети ҷумҳуриявӣ баргардонида хоҳанд шуд.
«Нақшаҳои минбаъда ва моддаҳои хароҷоти корхонаву ташкилот ва муассисаҳо як сол қабл омода мегарданд ва аксари онҳо минбаъд тағйир меёбанд ё дар давоми сол муҳиму рӯзмарра нашуда, аз ин рӯ, хароҷоти пулиро тақозо намекунанд», – гуфт ӯ ва илова кард, ки соли сипаришуда танҳо хадамоти коммуналӣ тамоми воситаҳои ҷудошударо пурра азхуд намуданд.
Давлатов таъкид кард, ки ба тақвияти андешаи мавҷуд набудани талаботи асоснок дар ягон соҳаи минтақа ба қайд гирифта нашудани қарз аз музди меҳнатро метавон далел овард.
