Дар фабрикаи парандапарварии муштараки Тоҷикистону Эрон дар ноҳияи Мӯъминобод ба парвариши зоти нави мурғҳои гӯштӣ оғоз карданд.
Тавре ба ОИ «Азия-Плюс» раиси ноҳияи Мӯъминобод Пирмад Зарифов хабар дод, тибқи ҳисобҳои пешакӣ ҳар мурғи ин зот ҳадди аққал 3 кг гӯшт хоҳад дод ва ин ҳам дар ҳолест, ки вазни чунин маҳсулот дар кишвар каме зиёдтар аз 1 кило аст. «Озмоиши ғизодиҳӣ нишон дод, ки вазни гӯшти ин навъи мурғҳоро метавон то ба 9 кило расонид», – гуфт ӯ.
Ба гуфтаи вай, бо парвариши ин мурғҳо мушкилоти воридоти мунтазами тухмҳо аз Эрон, ки минбаъд ба нархи маҳсулот таъсир мегузорад, низ ҳал гардида, айни замон масъалаи тайёр кардани ғизои махсус барои мурғҳо дар маҳал мавриди ҳаллу фасл қарор дорад.
Дар ҳамин ҳол, чӯҷаҳои аввалин бароварда шуда, вазнашон дар як шабонарӯз аз 84 то 110 грамм зиёд мешавад. Дар суҳбат бо хабарнигори ОИ «Азия-Плюс» мутахассисони корхона гуфтанд, на дертар аз 1-уми июли соли равон фурӯши гӯшти мурғ ба аҳолӣ оғоз мегардад ва то ахири сол парандапарварон ният доранд, ки ба бозор то 300 тонна гӯшти мурғ ба фурӯш бароранд. «Айни замон барқарор кардани боз 12 мурғхона идома дорад, ки ба ду баробар зиёд кардани истеҳсоли гӯшт мусоидат хоҳад кард», – гуфтанд мутахассисон.
