Дар иҷлосияи даҳуми Маҷлиси вакилони халқи шаҳри Душанбе даъвати чорум пешниҳоди раиси пойтахт дар бораи тағйири номи чанде аз кӯчаҳои шаҳри Душанбе дастгирӣ ёфт.
Тавре ба ОИ «Азия-Плюс» котиби матбуотии раиси шаҳри Душанбе Шавкат Саидов хабар дод, бо қарори маҷлис гузаргоҳи 1-уми кӯчаи Пионерская ба исми Ҳунарпешаи мардумии Иттиҳоди Шӯравӣ Ҳанифа Мавлонова, кӯчаи Привокзалная ба исми Шоири халқии Тоҷикистон Қутбӣ Киром ва кӯчаи 9-уми январ ба исми Шоири халқии ҷумҳурӣ Сафармуҳаммад Айюбӣ номгузорӣ шуданд.
Ба гуфтаи Ш.Саидов, дар маҷлис ҳамчунин қарор шуд, ки дар остонаи фарорасии моҳи шарифи Рамазон ба иштирокчиён ва маъюбони Ҷанги Бузурги Ватании муқими пойтахт кӯмаки якдафъаинаи моддӣ расонида шавад.
