Дар нимсолаи аввали соли равон дар қаламрави вилояти Суғд 88 нафар беморони ангезандаи норасоии масунияти одам (ВИЧ/АНМО) ва бемории норасоии масунияти одам (СПИД/ББНМО) ошкор ва ба қайд гирифта шуданд.
Зимни нишасти хабарӣ сардори Раёсати тандурустии вилояти Суғд Далил Тошматов гуфт, аз ин миқдори беморон 55 нафарашонро мардон ва 33 нафарашонро занон ташкил дода, 3 тан аз онҳо ноболиғон мебошанд. «Шумори умумии мубталоёни ин беморӣ дар вилоят 840 нафар аст», – гуфт вай.
Ба қавли Д.Тошматов, аз шумори умумии 840 нафар мубталоёни ин беморӣ, ки дар давраи аз соли 2001 то моҳи июли соли 2012 ба қайд гирифта шудаанд, 608 нафарашонро мардон ташкил дода, 230 нафар аз ин беморон ҳалок ва боз 20 нафари дигар ба хориҷи кишвар рафтаанд.
«Воситаҳои гирифторӣ ба ин беморӣ чунинанд: 332 нафар (39,4% – истеъмоли нашъа тавассути сӯзандору), 275 нафар (32,9%) – тавассути алоқаи ҷинсӣ, 5 нафар кӯдакон (0,7%) – аз модарашон сироят шудаанд ва 215 нафар беморон (25,5%) – тавассути воситаҳои номаълум», – афзуд сардори Раёсати тандурустии вилоят.
