Дар ноҳияи Темурмалики вилояти Хатлон табдили муассисаҳои динии мавриди истифода қарорнадошта ба иншооти таъъиноти зербинои иҷтимоӣ ба итмом расид.
Тавре ба ОИ «Азия-Плюс» мудири шуъбаи умури дини минтақаи Кӯлоб Шариф Абдулҳамидов хабар дод, шумори чунин иншоот дар ноҳияи мазкур 18 ададро ташкил додааст.
Ба гуфтаи ӯ, пас аз пош хӯрдани Иттиҳоди Шӯравӣ, дин ривоҷ ёфта, сокинони қариб тамоми маҳаллаҳо ва соҳибкорони алоҳида бидуни ба инобат гирифтани талабот ва ҳуҷҷатгузории зарурии расмӣ ибодатгоҳҳои зиёде бунёд намуданд.
«Вақте дар деҳот масҷидҳои ҷавобгӯ ба тамоми талаботи маросимҳои динӣ пайо шуданд, аксари ин ибодатгоҳҳҳо ба гӯшаи фаромӯшӣ партофта шуданд», – изҳор дошт вай.
Ш.Абдулҳамидов мегӯяд, аксари сокинони деҳот худашон аз мақомоти маҳаллии ҳокимияти давлатӣ дархост кардаанд, ки ин ё он ибодатгоҳи бекорхобида ба бунгоҳи тиббӣ, китобҳона, мактаби таҳсилоти ибтидоӣ ё дигар иншооти таъиноти иҷтимоӣ табдил дода шавад.
Зикр гардид, ки айни замон дар ноҳияи Темурмалик 44 адад масҷид ва дар минтақаи Кӯлоби вилояти Хатлон дар маҷмӯъ 566 иншооти динӣ фаъолият доранд.
