Коргардони шинохтаи тоҷик Барзу Абдураззоқовро хатари маҳрумият аз биноӣ таҳдид мекунад. Дар суҳбат бо ОИ «Азия-Плюс» номбурда гуфт, бар асари садамаи нақлиёти рӯзи 10-уми октябр зарбу лат хӯрдаву чашмонаш низ осеб дидаанд.
«Ҳангоми сабз будани чароғаки светофор ман аз роҳгузари назди бинои телевизони «Сафина» мегузаштам, ки ин дам ба ман автомашинаи «ба тӯй саросема» бархӯрд. Ман ба оинаи пеши автомашина бархӯрда, якчанд метр ба қафо партофта шудам. Моликони мошин маро ба беморхона бурданд», – гуфт вай.
Ба қавли коргардон, муддати чанд рӯзи пас аз садама нури чашмони ӯ бо суръати хеле зиёд паст шуда, санҷиш нишон додааст, ки биноии чашми рости ӯ ҳамагӣ 6%-ро ташкил медиҳад ва агар фавран муолиҷа оғоз нагардад, метавонад аз чашми чапаш ҳам маҳрум гардад.
Барзу Абдураззоқов мегӯяд, ба ронанда ҳеҷ даъвое надорад. «Ӯ ба тӯйи бародараш маҳсулот мебурд ва шитоб дошт. Онҳо маро партофта нарафтанд, вале баъдтар ҳангоме ҳамсарам баъзе чизҳоро мушаххас карданӣ шуд, ба зангҳи телефонӣ посух надоданд», – афзуд номбурда.
