Раиси шаҳри Душанбе Маҳмадсаид Убайдуллоев қарореро ба имзо расонид, ки мувофиқи он, аз 11-уми феврал то 5-уми июн, рӯзҳои душанбе то панҷашанбеи ҳар ҳафта дар тамоми микрорайонҳои пойтахт вохӯриҳои мақомоти раҳбарии шаҳрдорӣ, раисони ноҳияҳо, роҳбарони мақомоти интизомӣ ва вакилони маҷлисҳои вакилони халқи ноҳияву шаҳр бо аҳолӣ баргузор мегардад.
Тавре аз мақомоти шаҳрдории пойтахт хабар доданд, дар мулоқот бо аҳолии пойтахт масоили ободикунонии шаҳр, риояи қонун, расонидани кӯмак ба оилаҳои камбизоат ва дигар масоили рӯзмарра баррасӣ шуда, мувофиқи имкон мушкилоти ҷойдошта таъҷилан дар маҳалҳо ҳал карда мешаванд.
Ба иттилои манбаъ, муовини аввали раиси пойтахт Насрулло Хайруллоев, роҳбарияти мақомоти милисаи пойтахт, раиси ноҳия ва вакилони маҷлиси вакилони халқи шаҳру ноҳияи Сино бо аҳолии ноҳияи Сино, муовини раиси пойтахт Санавбар Раҳимова, мақомоти раҳбарии Раёсати КДАМ-и пойтахт, раиси ноҳияи И.Сомонӣ ва вакилони ноҳия бо аҳолии ноҳияи Исмоили Сомонӣ, муовини раиси шаҳри Душанбе Ҷамшед Мансуров, роҳбарияти Раёсати ВКД-и пойтахт, раиси ноҳияи Шоҳмансур ва вакилони ноҳия бо сокинони ноҳияи Шоҳмансур ва муовини раиси пойтахт Бурҳон Назаров, роҳбарияти РКДАМ-и Душанбе, раиси ноҳияи Фирдавсӣ ва вакилони ноҳия бо аҳолии ноҳияи Фирдавсӣ вохӯриҳо анҷом медиҳанд.
Зимнан зикр мегардад, ки дар бораи макон ва вақти баргузории ин вохӯриҳо аҳолӣ пешакӣ огоҳ карда мешавад.
