Таҳти сарварии Ҳунарманди халқии Русия Виктор Шемшур Сирки давлатии Маскав бо барномаи нав ба Душанбе меояд.
Тавре ба ОИ «Азия-Плюс» директори сирки давлатии Тоҷикистон Ҷамолиддин Муҷиддинов хабар дод, ҳунармандони сирки Маскав дар ҳайати 40 нафар ҳамарӯза барномаи 2-соатаи рангин пешкаш хоҳанд кард. «Аз баргузории намоиши аввали ҳунуармандони сирки Маскав рӯзи 17-уми феврал интизорӣ рафта, дар маҷмӯъ онҳо муддати як моҳ дар Тоҷикистион қарор хоҳанд дошт», – гуфт вай.
Ба қавли ӯ, дар намоишномаҳо масхарабозони номиву акробатҳо ва гимнастҳо ширкат варзида, аксари намоишномаҳо бо 45 навъи ҳайвоноти хонагиву ваҳшӣ доир мегарданд, ки барои онҳо дар сирк ҷойҳои махсус омода шудаанд. «Ба ин намоишномаҳо хоҳишмандон аллакай метавонанд билетҳо дастрас кунанд ва арзиши билет аз 15 то 50 сомониро ташкил медиҳад», – иброз дошт номбурда.
Директори сирки Тоҷикистон ҳамчунин изҳор намуд, ки барномаи ҳунармандони сирки Маскав дар доираи ҳамкориҳои муштараки сиркҳои Тоҷикистону Русия доир гардида, ба наздикӣ ҳунармандони сирки тоҷик низ ба тамошогарони Русия барномаи худро пешкаш хоҳанд намуд.
