Президенти кишвар Эмомалӣ Раҳмон ба хонаи кӯдакони ятиму бепарастори деҳаи Танобчии ноҳияи Темурмалик ташриф оварда, бо тарбиятгирандагони он ва мардуми ноҳия мулоқот намуд.
Бино ба маълумоти хадамоти матбуоти сарварид давлат, дар роҳи ҳаракат ба сӯйи хонаи кӯдакон Эмомалӣ Раҳмон шоҳиди намоишгоҳи наврӯзӣ гардид. Дар ин ҷо мардуми ҳунарманди ноҳия маҳсули ҳунарҳои мардумӣ, аз қабили хӯроку шириниҳои наврӯзӣ, суманак, либосҳои миллии тоҷикӣ бо гулдӯзию зардӯзӣ, асбобу олоти кории рӯзгор ва ҳунари волои базму тараби наврӯзӣ намоиш доданд.
Сарвари давлат ба ҳунари шогирдони мактаби гӯштигирии ба номи ҷаҳонпаҳлавон Саидмуъмин Раҳимов таваҷҷуҳ зоҳир намуда, онҳо ва кулли ҷавонони дигарро ба варзишу тарбияи ҷисмонӣ ва тарзи ҳаёти солим ҳидоят намуд. Таваҷҷуҳи хоса, ҳамчунин ба аспҳои зоти тоҷикӣ ва зиёд намудани саршумори ин зот зоҳир гардид.
Зимни шиносоӣ бо тухмиҳои ғалладона, аз ҷумла зикр гардид, ки ноҳияи Темурмалик дар гузашта яке аз бузургтарин ноҳияҳо доир ба парвиши тухмии ғалладона буд. Аз ин хотир ба масъулин дастур дода шуд, ки ин мақоми волои ноҳияро дубора барқарор намоянд.
Сипас Эмомалӣ Раҳмон ба хонаи кӯдакон ташриф оварда, бо шароити будубоши шаборӯзӣ ва таълиму тарбияи тарбиятгирандагони он бевосита шинос шуд. Тавре аён гардид, ин муассисаи тарбиявӣ бо супориши Сарвари давлат Эмомалӣ Раҳмон мавриди тармиму навсозӣ қарор гирифта, дорои шароити хуби зиндагӣ ва таълиму тарбия гардидааст.
Зикр гардид, ки аз 128 компютери ба мактабҳои ин ноҳия туҳфанамудаи Сарвари давлат 20 тоаш ба ин муассисаи таълимӣ оварда шудааст. Хонаи кӯдакони ятиму бепарастор дорои утоқҳои дарстайёркунӣ, истироҳату фароғат, хобгоҳҳои бо шароити муосир муҷҷаҳҳаз, ошхонаи барҳаво, толори калони варзишӣ ва дигар шароити зарурӣ мебошад.
Аз ҷониби сарвари давлат ба ҳамаи тарбиятгирандагони ин муассисаи иҷтимоӣ, ки шумораи умумиашон 128 нафар аст ва ҳам ба тарбиятгирандагони мактаб-интернати ҷамоати Кангурт номгӯи зиёди сарулибос, хӯроворӣ ва ширинию дигар туҳфаҳо тақдим гардид. Қобили зикр аст, ки дар арафаи Наврӯзи хуҷастапай ба зиёда аз 4 ҳазор кӯдакону наврасони ҷумҳурӣ, ки аз падару модар ятим мондаанд, кӯмакҳои моддии Президенти кишвар Эмомалӣ Раҳмон расонда шуд.
Дар саҳни ҳавлии хонаи кӯдакони ятиму бепарастор Эмомалӣ Раҳмон бо устодону тарбиятгирандагони он ва ҳам роҳбарону фаъолони ноҳияи Темурмалик мулоқоти судманд анҷом дод. Зимни суханронии сарвари давлат, аз ҷумла зикр гардид, ки тамоми хонаҳои кӯдакони ятиму бепарастор, мактаб интернатҳо ва дигар муассисаҳои иҷтимоии кишвар бар замми таъминоти мутамаркази давлатӣ барои дастгирию нигаҳбонии иловагӣ ба вазорату идораҳо ва дигар сохторҳои давлатӣ вобаста шудаанд.
Ғайр аз ин, президенти кишвар н дастур дод, ки дар муддати кӯтоҳ харҷномаи тармиму навсозии тамоми чунин муассисаҳои тармимталаб, аз ҷумла мактаб интернати Кангурт, таҳия ва ба президенти кишвар барои чораандешӣ пешниҳод карда шавад. Дастур дода шуд, ки дар назди хонаи кӯдакони ятиму бепарастори деҳаи Танобчии ноҳияи Темурмалик як бинои алоҳидаи таълимӣ низ бо тамоми шароити муосири зарурӣ бунёд карда шавад.
