Дар семоҳаи аввали соли ҷорӣ бо мусоидати мақомоти хадамоти шуғли кишвар дар Тоҷикистон ҳудуди 8,4 ҳазор нафар шаҳрвандон бо ҷойи корӣ таъмин карда шуданд, ки аз миқдори умумии шаҳрвандони муроҷиаткарда 26%-ро ташкил медиҳад.
Бино ба маълумоти Агентии давлатии ҳифзи иҷтимоӣ, шуғли аҳолӣ ва муҳоҷирати ҶТ, аз оғози сол ба Агентии мазкур зиёда аз 32,2 ҳазор нафар шаҳрвандони ҷумҳурӣ муроҷиат кардаанд, ки беш аз 18,5 ҳазор нафарашон ҳамчун корҷӯ ба қайд гирифта шуда, наздики 13,2 ҳазор нафарашон расман бекор эътироф шудаанд.
«Шумори ками таъмини шаҳрвандон бо ҷойҳои корӣ ба сатҳи тахассусии корҷӯён ва ҳаҷми ночизи музди меҳнат вобаста аст», – мегӯянд дар Агентӣ.
Дар ҳамин ҳол, дар зарфи се моҳи аввали соли равон тақрибан 1,7 ҳазор нафар ба маблағи умумии ҳудуди 595 ҳазор сомонӣ (125 ҳазор $) барои бекорӣ кӯмакпулӣ гирифтаанд.
Ба санаи 1-уми апрели соли равон дар хадамоти Агентии шуғли аҳолӣ беш аз 77,6 ҳазор нафар ҳамчун афроди корҷӯ ва 55,3 ҳазор нафар ҳамчун шаҳрвандони расман бекор ба қайд гирифта шудаанд. Дар ин давра беш аз 5,1 ҳазор нафар ба касбомӯзӣ ва зиёда аз 1,4 ҳаззор нафар ба корҳои ҷамъиятии пардохтшаванда равона гардида, ба 705 нафар шаҳрвандон ҷиҳати роҳандозии фаъолияти соҳибкории хусусӣ қарзҳои имтиёзнок ҷудо карда шудааст.
Ба иттилои Агентӣ, дар давоми моҳҳои январ-марти соли ҷорӣ дар Тоҷикистон дар маҷмӯъ беш аз 51,3 ҳазор ҷойҳои нави корӣ фароҳам оварда шудаанд, ки нисбат ба нишондиҳандаи ҳамин давраи соли 2012 ба андозаи 50,2% зиёдтар аст.
