Ҳаракати нақлиёт тавассути қисмати ҷанубии пули хиёбони Саъдии Шерозӣ (рӯйи рӯдхонаи Душанбинка), ки ахири моҳи май баста шуда буд, аввали моҳи август барқарор карда мешавад.
Чӣ тавре ки ба ОИ «Азия-Плюс» сардори Раёсати истифодаи роҳҳои мақомоти шаҳрдории пойтахт Сӯҳроб Мирзоев хабар дод, аз аввали моҳи август ҳаракати нақлиёт тариқи қисмати азнавсохтаи ҷанубии пул сурат гирифта, дар як вақт корҳои таҷдиди қисмати шимолии пул шурӯъ мегарданд, ки он ҳам муддати ду моҳ идома хоҳад ёфт.
«Барои таъмир ва азнавсозии пули мазкур ва роҳҳои вуруд ба он аз буҷети пойтахт 14 млн. сомонӣ маблағ ҷудо шуд», – иброз дошт вай.
Ба қавли Мирзоев, ҷиҳати суръатбахшии бештар ба корҳои азнавсозии роҳу пулҳои пойтахт иншооти кӯҳнаи коммуникатсионӣ монеъа эҷод месозанд, ки маъмулан зери роҳҳо сохта шудаанд.
«Дар масъалаи маблағгузорӣ ва таъминот бо масолеҳи сохтмон бинокорони роҳу пулҳо ҳеҷ мушкилие надоранд», – зикр кард намояндаи мақомоти шаҳрдорӣ.
Номбурда изҳори итминон кард, ки корҳои таъмир ва азнавсозии аксари роҳҳои мошингради пойтахт бо наздикшавии таҷлили ҷашни солгарди навбатии Рӯзи истиқлолияти Тоҷикистон ба итмом хоҳанд расид.
