Обуҳавошиносони Тоҷикистон ба нуқтаи ниҳоӣ расидани гармии обуҳаво дар моҳи июлро пешгӯӣ мекунанд.
Бино ба маълумоти мутахассисони Муассисаи давлатӣ оид ба гидрометеорологияи ҷумҳурӣ, рӯзҳои 27-30-юми июл болоравии босуръати ҳарорат дар назар аст.
Тибқи пешгӯии обуҳавошиносон, дар ин рӯзҳо ҳарорати рӯзона дар вилояти Хатлон 41-46 дараҷа, вилояти Суғд – то 43 дараҷа, ноҳияҳои тобеи марказ – 38-43 ва манотиқи кӯҳистон – 35-40 дараҷа гарм мешавад.
«Бинобар сабаби муддати зиёд пойдор будани ҳарорати баланд ва дар назар набудани боришот, ин рӯзҳо ба вуҷуд омадани вазъҳои хатарноки сар задани сӯхтор дар ҷумҳурӣ, баланд шудани сатҳи оби дарёҳо, хатари тармафароӣ дар баландии 4000-4500 метр аз эҳтимол дур набуда, аз номусоидии обуҳаво барои афроде, ки вазъи солимиашон ба мутобиқати иқлим зиёд вобастагӣ дорад, интизорӣ меравад», – таъкид месозанд обуҳавошиносон.
Ғайр аз ин, обуҳавошиносон ба шаҳрвандон тавсия медиҳанд, ки рӯзҳои гармии тоқатфарсо аз ҳаракат дар роҳҳои автомобилгард тавассути автомашинаҳои боркаши бузургҳаҷм худдорӣ кунанд.
