Имрӯз зимни суханронӣ дар ҷамъомади тантанавӣ ба истиқболи солгарди 22-юми Истиқлоли давлатии Тоҷикистон президенти мамлакат изҳор намуд, ки маъракаи интихоботи президентӣ, ки санаи 6-уми ноябри соли равон таъин шудааст, барои демократияи ҷавони тоҷик як имтиҳон аст.
Сарвари давлат изҳори итимнон намуд, ки ин чорабинӣ бояд дар чаҳорчӯбаи қонун ва шаффофу озод баргузор гардад, то ин ки мардуми Тоҷикистон имконияти иштирок ва интихоби номзади арзандаро ба ин мақоми олӣ дошта бошанд.
Дар ин робита Эмомалӣ Раҳмон аз онҳое, ки мехоҳанд номзадии худро ба ин чорабинии муҳим пешниҳод намоянд, хоҳиш кард, ки ба ин маърака бо маданияти баланди сиёсӣ ва масъулияти комили ватандорӣ муносибат намоянд. «Интихоботи мо набояд ба майдони моҷароҷӯиву ҳангоматалабӣ, балки ба минбари муаррифии барномаҳои комил, андешаҳои созанда ва имкониятҳои зеҳнии арзишманд табдил ёбад, ки мардум тавонанд ҳуқуқи конститутсиониашонро озодона ва бо майлу иродаи худ амалӣ намоянд», – гуфт президенти кишвар.
Дар суханронии худ президенти мамлакат роҷеъ ба дастовардҳои Тоҷикистон тӯли солҳои соҳибисқлолӣ муфассал маълумот дода, таъкид дошт, ки «дастовардҳои Тоҷикистони соҳибистиқлол дар самти татбиқи се ҳадафи стратегӣ – таъмини истиқлолияти энергетикӣ, аз бунбасти коммуникатсионӣ раҳоӣ бахшидани кишвар ва ҳифзи амнияти озуқаворӣ назаррас мебошанд ва тайи солҳои охир беҳтар шудани вазъи соҳаҳои саноат, энергетика, кишоварзӣ, нақлиёт ва роҳсозӣ, коммуникатсия ва технологияи иттилоотиро ҳамватанони азизи мо хуб эҳсос мекунанд».
