Раиси Ҳизби сотсиал-демократии Тоҷикистон (ҲСДТ) Раҳматилло Зойиров дар бораи бекор шуморидани изҳороти раиси КМИР Шермуҳаммади Шоҳиён оид ба ғайриимкон будани ҷамъоварии имзоҳои муҳоҷирони корӣ ба ҷонибдории номзадҳо ба мансаби президентӣ ба президенти кишвар ва Вазорати корҳои хориҷии ҷумҳурӣ муроҷиат кард. Дар сурати ба инобат нагирифтани дархост ба интихобот таҳрим эълон карда мешавад.
Шоҳиён изҳороти худро бар асоси далеле шарҳ медиҳад, ки тибқи меъёрҳои қонун, варақаҳо барои ҷамъоварии имзоҳо бояд аз ҷониби раисони шаҳру ноҳияҳо ба имзо расанд.
Р.Зойиров бошад, бар он назар аст, ки мутобиқи моддаи 10, қ. 1-и Конститутсияи ҷумҳурӣ, изҳороти раиси КМИР қувваи ҳуқуқӣ надорад. Ба қавли Зойиров, ҳамчунин изҳороти Шоҳиён комилан мухолифи моддаи 14, қ. 2 ва 3-и Конститусия аст.
Дар ин робита Зойиров аз раҳбарияти кишвар, аз ҷумла Вазорати корҳои хориҷӣ дархост кардааст, ки иштироки шаҳрвандони Тоҷикистон – муҳоҷирони корӣ ва дигар афроди берун аз қаламрави ҷумҳурӣ қарордоштаро дар ҷамъоварии имзоҳо ба ҷонибдории номзадҳо ба мансаби президентӣ (масалан, тариқи овоздиҳии электронӣ (огоҳинома), имкони ҷамъоварии имзоҳо ва тасдиқи он дар сафорат ё консулгариҳо ва ғайра) таъмин намояд.
«Дар сурати таъмин накардани муҳоҷирони корӣ ба ҳуқуқи ҷамъоварии имзоҳо, мо аз тамоми интихобкунандагони ҷумҳурӣ, муҳоҷирони корӣ ва афроди берун аз қаламрави ҷумҳурӣ қарордошта даъват мекунем, ки ба хотири ҳамраъйӣ ҷиҳати таъмини ҳуқуқ ва озодиҳои баробар ба муҳоҷирони корӣ ҳамчун ризқрасонони кишвар, ки бидуни онҳо ҳукумат аллакай кайҳо бояд муфлис мешуд ва риояи муқаррароти Конститусия, ба интихобот таҳрим эълон карда шавад», – мегӯяд раиси ҲСДТ.
