Дар ҳамоиши тиҷоратии соҳибкорони Тоҷикистону Олмон, ки нимаи дуюми имрӯз дар қароргоҳи беруназшаҳрии ҳукумати Тоҷикистон «Пуғус», воқеъ дар ноҳияи Варзоб доир мегардад, баррасии рушди бахши энергетика мавзӯи асосии рӯзнома аст.
Тавре ба ОИ «Азия-Плюс» аз Кумитаи давлатии сармоягузорӣ ва идораи амволи давлатии ҶТ хабар доданд, дар ҳамоиш, аз ҷумла баррасии масъалаҳои имкони муштаракан роҳандозии истеҳсоли таҷҳизот барои тавлиди энергияи офтобӣ, таъмини истифодаи пурсамари энергия ва имкони сармоягузориҳо ба иқтисоди Тоҷикистон дар назар аст.
Ба ҳайати тоҷирони Олмон беш аз 40 нафар соҳибкорон шомиланд, ки ширкатҳои гуногун дар соҳаҳои энергетика, саноат, бахши кишоварзӣ ва ғайраро намояндагӣ мекунанд. Ҳайати Тоҷикистон дар ин ҳамоиш аз ҳудуди 100 нафар тоҷирон иборат аст.
Бино ба маълумоти Кумита, тӯли солҳои соҳибистиқлолӣ миёни Тоҷикистону Олмон дар бахшҳои иқтисолдиву иҷтимоӣ 46 санади дуҷониба ба имзо расидааст, ки нишондиҳандаи беҳтарин миёни кишварҳои Иттиҳоди Аврупо аст. «Дар зарфи 20 соли роҳандозии муносибатҳои дипломатӣ Олмон баҳри дастгирии рушди иҷтимоиву иқтисодии Тоҷикистон 140 млн. евро маблағ равона кард», – гуфтанд дар Кумита.
Тибқи маълумоти Агентии омори назди президенти ҶТ, соли 2012 ҳаҷми муомилоти молӣ миёни Тоҷикистону Олмон ҳудуди 35 млн. доллари ИМА-ро ташкил додааст, ки нисбат ба нишондиҳандаи соли 2011 ба андозаи 5% камтар мебошад.
