Рӯзи 18 сентябри соли равон Президенти мамлакат Эмомалӣ Раҳмон Созишнома байни Тоҷикистону Русияро дар бораи мақом ва шартҳои будубоши пойгоҳи ҳарбии Россия дар қаламрави Тоҷикистон, ки 5 октябри соли 2012 дар шаҳри Душанбе ба имзо расида буд, барои тасдиқ ба Маҷлиси намояндагони Маҷлиси Олии кишвар пешниҳод кард.
Бино ба иттилои хадамоти матбуоти сарвари давлат, дар асоси мувофиқаи пешакии ҷонибҳо ҷиҳати дар маҷмӯъ баррасӣ намудани масъалаҳо қаблан ҷониби Президент барои тасдиқ ба Парлумон Созишнома байни Тоҷикистон ва Русия дар бораи тартиби будубоши шаҳрвандони Тоҷикистон дар қаламрави Русия, ки дар шаҳри Москва 8 феврали соли 2013 ба имзо расидааст, пешниҳод гардида буд.
Гуфта мешавад, ҳамчунин, бо қарори Ҳукумат аз 2 майи соли 2013 Созишнома байни Ҳукумати Тоҷикистон ва Ҳукумати Русия оид ба ҳамкорӣ дар соҳаи интиқоли маҳсулоти нафтӣ ба Тоҷикистон, ки 6 феврали соли 2013 дар шаҳри Москва ба имзо расидааст, тасдиқ гардид.
