Роҳиоҳанчиёни тоҷик сабаби ба садама дучор шудани қатораи самти Душанбе-Хуҷанд дар қаламрави кишвари ҳамсояи Ӯзбекистонро мавриди таҳқиқ қарор додаанд.
Тавре ба ОИ «Азия-Плюс» аз КВД «Роҳи оҳани Тоҷикистон» хабар доданд, айни замон кормандони роҳи оҳан ва мутахассисони Вазорати нақлиёти ҷумҳурӣ тамоми ҳолатҳои садамаро таҳлилу баррасӣ доранд.
Дар ҳамин ҳол, шоми дирӯз бо як ҳайати қатора мусофирони қатораи мавриди садама дучоргардида ба ноҳияи Спитамени вилояти Суғд мунтақил гардидаанд, ки 33 нафарашон ҷароҳатбардоштагон будаанд.
Бино ба маълумоти Вазорати мудофиаи ҷумҳурӣ, дар қатора 200 нафар наваскарон ва афсарони Вазорати мудофиаи ҷумҳурӣ ҳузур доштанд.
Ёдрас мекунем, ки соати 09:40 дақиқаи рӯзи 10-уми октябр қатораи масири Душанбе-Хуҷанд дар қаламрави Ӯзбекистон ба садама дучор шуд. Панҷ вагони ин қатора дар ноҳияи Ғаллаарали вилояти Ҷиззахи Ӯзбекистон аз роҳи оҳан берун рафта, сарнагун шуда буд.
