Шӯрои сиёсии Ҳизби Наҳзати Исломии Тоҷикистон
ҳукми 5 сол ҳабси
раиси шуъбаи вилоятии ҳизб дар Бадахшонро маҳкум намуда, инро як амали интиқомҷуёна ва иғвогарона аз тарафи баъзе мақомот медонад.
Дар изҳороти дар ин робита интишоршудаи Шӯрои сиёсии ҲНИт зикр мегардад, ки пас аз шаҳодати собиқ роҳбарони ин шуъба Имомназар Имомназаров ва Сабзаалӣ Мамадризоев, Саъодатшоҳ ҳамчун як ҷавонмарди ҷасур ва боақида нишон дод, ки бо қатлу куштор ва фишор наметавон пеши роҳи андеша ва иродаи инсонҳои бедорро гирифт.
«Маъмулан, пайдоиши чунин маводҳо дар солҳои «репрессия» ва мутаъассифона, дар рӯзҳои мо ҳам, нишонаи тасмимҳои сиёсӣ нисбати афрод ва гурӯҳҳо будааст, ки баъдан мақомоти марбута онҳоро сохтакорона, тобиши ҳуқуқӣ ва ҷиноӣ медиҳанд. Таҷриба нишон медиҳад, ки бо чунин услуб дилхоҳ инсонро айбдор дониста, рақибони сиёсӣ ва гуногунандешро мавриди таъкиб ва фишор қарор медиҳанд», – омадааст дар изҳорот.
Гуфта мешавад, Шӯрои сиёсии ҲНИТ бо пахши ин баёния бори дигар диққати роҳбарияти кишварро ба ин раванди номатлуб ҷалб менамояд, ки иқдомҳои лозимиро бияндешанд, то баъзе афрод ва ниҳодҳо Тоҷикистонро ба як кишвари дорои ҳокимияти комилан худкомаи саркубгар табдил надиҳанд.
«Бинобар ин, Шӯрои сиёсии ҲНИТ даъват мекунад, ки мақомот дар қазияи Саъодатшоҳ Адолатов бознигарӣ намуда, ин ҳукми беасосро аз болои ишон бардоранд», – баён мегардад дар изҳоротии Шӯрои сиёсии ҳизб.
Инчунин даъват мешавад, ки аз таъқибу фишорҳо алайҳи дигарандешон даст кашида, пеши роҳи болоравии рӯҳияи эътирозӣ ва норозигии мардум аз сиёсатҳои ахири ниҳодҳои давлатӣ алайҳи ҳизбу ҳаракатҳо ва афроди оддӣ гирифта шавад.
