Зимни нишасти хабарӣ прокурори генералии ҷумҳурӣ Шерхон Салимзода изҳор намуд, ки нимсолаи аввали соли ҷорӣ аз ҷониби ноболиғон 468 ҷиноят содир шудааст, ки дар муқоиса бо ҳамин давраи соли гузашта 11 ҳолат ё худ 2,4% зиёдтар аст.
Дар ҳамин ҳол, ӯ қайд кард, ки тамоили сабти бештари ҷинояткорӣ миёни ноболиғон ба беҳтар шудани фаъолияти кормандони ниҳодҳои интизомӣ дар самти ошкор кардани ҷинояткорон марбут мебошад.
«Қобили зикр аст, ки мушкили асосӣ дар ин самт ҷанҷолу занозанӣ ва муноқишаҳои дастаҷамъона миёни ноболиғон буда, мо талош дорем, ки ҳеҷ кадоме аз иштирокчиёни ин муноқишаҳо беҷазо намонанд, вале ба он такя хоҳем кард, ки миёни ноболиғон корҳои тарбиявӣ ба роҳ монда шаванд, чунки танҳо бо ҷазо наметавон ин падидаро аз байн бурд», – гуфт Салимзода.
Бо ёдоварӣ аз
ҳодисаи кордзанӣ
миёни хонандагони синфҳои болоии мактабҳои шаҳри Душанбе дар соли равон, ки бар асари он толибилми синфи 11-уми мактаби №66 Бурҳониддин Зарифов ба ҳалокат расид, прокурори генералӣ зикр кард, ки гунаҳкорони ин ҳодиса дар сурати собит шудани айбашон ҳатман муҷозот хоҳанд шуд.
