Ҷей Ди Вэнс, муовини раисҷумҳури Амрико гуфтааст, ки Вашингтону Теҳрон ба созиши хатми ҷанг наздик шудаанд, вале ҳоло он ниҳоӣ нашудааст. Ба гуфтаи ӯ, ду тараф чанд масъалаи ҳалношударо пеш аз ба даст овардани созиш дар бораи ҷанг бояд ҳал кунанд.
Ин дар ҳолест, ки расонаҳо аз даст ёфтани Амрикову Эрон ба як тафоҳумномаи тамдиди 60-рӯзаи оташбас ва оғози музокирот дар бораи барномаи ҳастаии Ҷумҳурии Исломӣ хабар медищанд.
Эрон то кунун дар ин маврид расман изҳори назар накардааст ва расонаҳои ғарбӣ ҳам навиштаанд, ки тафоҳумномаи нави оташбас ҳанӯз аз ҷониби раҳбарони ду кишвар тасдиқи ниҳоӣ нагирифтааст.
Венс 28-уми май ба рӯзноманигорон гуфтааст, ки “ман кафолат дода наметавонам, ки мо ба созиш мерасем, аммо ҳоло эҳсоси нисбатан мусбате дорам”.
Ба қавли ӯ, музокиракунандагони ҳарду ҷониб “дар бораи якчанд масъалаи марбут ба матни созишнома”, аз ҷумла “масъалаи ғанисозии уран”, гуфтугӯ мекунанд.
Дар ҳамин ҳол расонаҳои амрикоӣ, аз ҷумла, “Аксиос”, “Ройтерз” ва “Ассошиэйтед пресс” гузориш додаанд, ки музокиракунандагони Эрон ва Амрико лоиҳаи ёддошти тафоҳумеро омода кардаанд, ки ба ҷуз тамдиди оташбас ба муддати 60 рӯз, масъалаи оғози даври тозаи музокирот бар сари барномаи ҳастаӣ ва боз шудани тангаи Ҳурмузро дар бар мегирад.
Ба гузориши “Ассошиэйтед пресс”, ин тафоҳумнома метавонад убури “бидуни маҳдудият” аз тангаи Ҳурмузро имконпазир кунад ва Эрон бар асоси он 30 рӯз вақт дорад, ки минҳои дар ин гузаргоҳи борики дарёӣ гузошташударо ҷамъоварӣ кунад.
Тибқи ин гузоришҳо, Амрико муҳосираи баҳрии Эронро лағв карда, бо додани имтиёзҳои таҳримӣ ба Эрон иҷозат хоҳад дод, ки содироти нафти худро аз сар гирад.
Ин ҳама гузоришҳо дар ҳолест, ки дар рӯзҳои ахир Амрикову Эрон чанд бор ба якдигар ҳамла карда, ҷониби муоқбилро ба нақзи оташбас муттаҳам карданд.
Ин ҳама танишу ҷанг ва муҳосираву талоши бозкушоии тангаи Ҳурмуз кай ва чаро оғоз шуд ва вазъи кунунӣ дар Ховари Миёна чист, дар ин пайванд хонед.
