Кормандони Вазорати корҳои дохилии Тоҷикистон ба гумони даст доштан дар ғоратгарӣ замони ҷанги шаҳрвандӣ дар ҷумҳурӣ, сокини 37-солаи ноҳияи Ҷиргатол Баҳромҷон Қаландаровро ба ҳабс гирифтанд.
Бино ба иттилои маркази матбуоти ВКД ҶТ, соли 1998 Б.Қаландаров ба гурӯҳи мусаллаҳи ғайриқонунӣ таҳти раҳбарии айни замон маҳкумшуда Ҳокимбек Ҳомидов шомил будааст.
Моҳи декабри соли 1998 Б.Қаландаров ва 4 нафар ҳаммаслакони ӯ мусаллаҳ бо автоматҳои Калашников ба манзили сокини ноҳияи Рӯдакӣ Теша Маҳмудов ворид шуда, бо таҳдиди зӯроварӣ аз ӯ ҷавоҳиротҳои тиллогин ва молу ашёҳои рӯзгор, ҷамъ ба маблағи 800-доллари амрикоӣ ва 327 ҳазор рублро тасарруф намуда, охиронро лату кӯб намудаанд.
Худи ҳамон шаб ин гурӯҳи мусаллаҳ ҳамчунин вориди хонаи истиқоматии сокини дигари ин ноҳия Шамсиддин Исматов шуда, бо истифода аз силоҳи оташфишон, бо роҳи таҳдиди истифодаи зӯроварӣ аз ӯ 200 ҳазор рублро тасарруф намуда, аз ҷойи ҳодиса ғайб задаанд.
Гуфта мешавад, аз рӯи ин ҳодиса парвандаи ҷиноӣ оғоз гардида, тафтишот идома дорад.
