Кормандони Раёсати Вазорати корҳои дохилии Тоҷикистон дар шаҳри Душанбе сокини 20-солаи пойтахт Фирӯз Файзов, яке аз ҳамлагаронеро, ки ҳамроҳи ҳаммаслаконаш бо корд ба шаҳрванди Ҳиндустон ҳамла оварда, ӯро захмӣ карданд, боздошт намуданд.
Аз маркази матбуоти Раёсати ВКД Тоҷикистон дар шаҳри Душанбе ба «Азия-Плюс» дар ин робита иттилоъ доданд, ки боздоштшуда ва ҳаммаслакони ӯ – Фаррух Ҳошимов, сокини 26-солаи ноҳияи Темурмалик як шахсе бо номи Саидҷаъфар рӯзи 22-юми сентябр назди тарабхонаи «Қанд»-и пойтахт бо шаҳрванди 40-солаи Ҳиндустон, корманди ҶДММ «ИМС-Преджент-менеджмент» Неоги Ависеги ба муноқиша пардохта, бо зарбаҳои корд ӯро захмӣ мекунанд ва аз ҷойи ҳодиса ғайб мезананд.
Ба иттилои манбаъ, айни замон ҷиҳати боздошти дигар ҳаммаслакони Ф.Файзов тадбирҳои фаврӣ андешида шуда, шаҳрванди Ҳиндустон дар Маркази миллии тиббӣ бистарӣ шудааст.
