Шӯрои муфтиёти Русия маълумоти муовини раиси КДАМ ҶТ дар бораи ба нуқтаи ҷалби террористон табдил ёфтани масҷиди ҷомеъи Маскавро рад кард.
«Дар масҷиди ҷомеъ оид ба пешгирии ҳама гуна рӯҳияву иқдомҳои тундгароӣ ва имкони паҳншавии он миёни ибодаткунандагон тадбирҳои ҷиддӣ андешида мешаванд, аз ин рӯ, ҳама гуна изҳорот дар бораи дар қаламрави масҷид мавҷуд будани нуқтаҳои ҷалбу кирои шаҳрвандон асоси воқеӣ надоранд», – омадааст дар
изҳороти
Раёсати динии мусалмонони қисмати аврупоии Русия.
Муаллифони изҳорот зикр мекунанд, ки раҳбарияти масҷид соли 2013 ба сафоратхонаҳои Тоҷикистону Ӯзбекистон ва Қирғизистон бо дархости сафарбар намудани имомхатибони дорои маълуомти олии динӣ муроҷиат кардааст, то ки бо намояндагони диаспораҳои миллӣ бо забони модарии онҳо корҳои тарғиботиро ба роҳ монанд, вале дар ин самт танҳо бо намояндагони Қирғизистон чунин фаъолият роҳандозӣ шудаасту халос.
Ҳамчунин зикр мегардад, ки айни замон дар ин масҷид бо намояндагони мардуми тотор, тоҷик, қирғиз ва доғистониҳо бо забонҳои русиву миллӣ суҳбату корҳои фаҳмондадиҳӣ гузаронида мешавад.
«Аз ҷониби худ, сафоратхонахои Тоҷикистону Ӯзбекистон ва дигар кишварҳо, ки манфиатҳои давлатии сафоратхонаҳоро ҳимоят мекунанд, бояд назоратро ҷорӣ намуда, тадбирҳои пешгирии чунин амалҳоро роҳандозӣ намоянд ва барои шаҳрвандони худ ҳам дар дохил ва ҳам дар хориҷи кишварашон масъулият дошта бошанд», – таъкид мешавад дар изҳорот.
Ёдрас мекунем, ки зимни суханронӣ дар музокироти парлумонӣ санаи 21-уми ноябр муовини раиси КДАМ Тоҷикистон Акрам Амонов изҳор намуда буд, ки шаҳрвандони Тоҷикистон ба амалиёти ҷангӣ дар Сурия тариқи қаламрави Русия ва Афғонистон сафарбар мешаванд ва яке аз нуқтаҳои сафарбарии ҷангиён ба Сурия дар шаҳри Маскав, хиёбони сулҳ (каме дуртар Масҷиди ҷомеи Маскав ҷойгир шудааст) воқеъ аст.
