Дар толори «Маркази ҷавонон ба номи устод Лоиқ Шералӣ» бо ибтикори Муассисаи давлатии «Маркази илмии Камоли Хуҷандӣ» конфронси илмӣ бо унвони «Камоли Хуҷандӣ ва рушди адабу фарҳанги миллӣ» баргузор гардид.
Бино ба иттилои хадамоти матбуоти раиси вилояти Суғд, чорабинии мазкур аз нахустин конфронсҳои «Маркази илмии Камоли Хуҷандӣ» ба ҳисоб рафта, дар он самтҳои фаъолияти муассиса муаррифӣ карда шуд.
Дар конфронс намояндагон аз мақомоти иҷроияи ҳокимияти давлатии вилояти Суғд, олимон, адибон, устодони макотиб ва дўстдорони илму адабиёт ширкат намуданд.
Директори Муассисаи давлатии «Маркази илмии Камоли Хуҷандӣ» доктори илмҳои филологӣ Насриддинов Фахриддин конфронсро ифтитоҳ намуда, доир ба мақсад ва ҳадафҳои маркази илмӣ маълумот дод.
Дар идома намояндаи мақомоти иҷроияи ҳокимияти давлатии вилоят Аъзам Ҳотамӣ, ҳозиронро бо ифтитоҳи чунин марказ табрик намуд.
Сипас Раиси шўъбаи суғдии Иттифоқи нависандагони Тоҷикистон Аҳмадҷони Раҳматзод дар бораи «Ҷойгоҳи Шайх Камоли Хуҷандӣ дар ташаккули адабу фарҳанги миллӣ» сўҳбат кард.
Инчунин, номзади илмҳои филологӣ Саидумрон Саидов дар мазўи «Нашрҳои илмӣ-интиқодии девони Камоли Хуҷандӣ дар санҷаи нақд» ва номзади илмҳои филологӣ Тоҷибой Султонӣ дар мавзўи «Муҳаққиқони тоҷик ва маърифати аҳволу ашъори Камоли Хуҷандӣ» баромад намуданд.
Ҳамчунин дар маркази ҷавонон миёни макотиби олии вилоят озмуни нахустини қироаткунандагони назми Камоли Хуҷандӣ доир гардид.
Иштирокчиёни озмун аз рӯи шартҳои тарзи қироат, сухангарӣ дар назм, саволу посухҳо оид ба ҳаёт ва фаъолияти шоир, навиштани шеъри шоир бо хатти арабӣ ва намоиши саҳнача аз ҳаёти Камоли Хуҷандӣ қувваозмоӣ карданд.
Аз рӯи натиҷаҳои озмун мақоми аввалро дастаи Донишгоҳи давлатии Хуҷанд «Сеҳри мубин», ҷойи дуюмро дастаи Донишгоҳи давлатии ҳуқуқ, тиҷорат ва сиёсати Тоҷикистон «Сафинаи Камол» ва зинаи сеюмро дастаи Донишкадаи политехникии Хуҷанд «Дурфишон» ишғол намуданд.
