– Дар Тоҷикистон чун пешин афроди боздоштшударо ҳама ҷо ва бидуни ҷазо мавриди шиканҷа ва рафтори бераҳмона қарор медиҳанд, – гуфта мешавад дар
гузориши
Созмони байнулмилалии ҳомии ҳуқуқи Amnesty International.
«Сарфи назар аз қабули нақшаи амал оид ба иҷрои тавсияҳои Кумитаи СММ алайҳи шиканҷа, ки соли 2013 пешниҳод гардида буд, шиканҷа ва дигар навъҳои кирдори бераҳмона дар ҳама ҷо истифода мешаванд», – таъкид мекунанд муаллифони гузориш.
Дар гузориш қайд мешавад, ки тӯли давраи аз 1 декабри соли 2013 то 8 октябри соли 2014 ташкилотҳои ғайриҳукуматӣ 24 ҳолати истифодаи шиканҷаро сабт намуда, ҳукумат ҳуқуқ ба озодии баён, маҷлисҳо ва иттиҳодияҳоро маҳдуд кард.
«Моҳи майи соли 2014 ҳангоми амалиёти кормандони милиса дар Хоруғ 3 нафар ҳалок ва 5 нафар ҷароҳат бардошта, миёни нерӯҳои қудратӣ ва аҳолии маҳаллӣ муноқишаҳо рух доданд. Тафтиши ин ҳодиса идома дорад», – омадааст дар гузориш.
Дар Amnesty International зикр мекунанд, ки ҳодисаҳои муноқишаи тобистони соли 2012 дар Хоруғ, ки дар натиҷа даҳҳо нафар, аз ҷумла ҳадди ақал 22 нафар шаҳрвандони мулкӣ ҳалок шуданд, то ҳол пурсамар тафтиш нашудааст ва то ҳанӯз дар бораи шумори ҷабрдидагон аз ин ҳодисаҳо маълумоти саҳеҳ мавҷуд нест.
«Аксари ҷабрдидагон ва хешовандони онҳо аз тарси таъқиб шикоят намекунанд. Ба ҷавобгарии ҷиноятӣ кашидани кормандони мақомоти ҳифзи ҳуқуқ, ки ба истифодаи шиканҷа гумонбар мешаванд, аҳёнан ба амал меояд ва дар бисёре аз ҳолатҳо тафтиши ин парвандаҳо қатъ ё мутавваққиф мешавад. То ахири сол, ҳамагӣ 4 корманди мақомоти интизомӣ барои истифодаи шиканҷа маҳкум гардиданд», – баён мегардад дар гузориш.
Муаллифони гузориш таъкид месозанд, ки ба адвокатҳо чандин маротиба дастрасӣ ба мизоҷони боздоштшудаашон рад шуда, ин ҳолат бештар нисбати шахсоне роиҷ буд, ки аз ҷониби Кумитаи давлатии амнияти миллӣ боздошт мегардиданд.
Ҳамчунин қайд мешавад, ки давоми сол сиёсатмадорон, фаъолони ҷомеаи шаҳрвандӣ ва журналистон барои интиқод аз ҳукумат мавриди таъқиб қарор гирифта, аз ҷумла нисбати журналистон ва ВАО ҳудуди 15 даъво пеш оварда шуд.
Ғайр аз ин, таҳиягарони гузориш зикр мекунанд, ки муддати сол чандин маротиба дастрасӣ ба даҳҳо торнамоҳои писандидаи иттилоотӣ ва шабакаҳои иҷтимоӣ муваққатан қатъ карда шуд ва ширкатҳои фароҳамсози интернет ин амалро бо дастури мустақими хадамоти давлатии танзими алоқа анҷом доданд.
Ҳамчунин гуфта мешавад, созмонҳои ҳомии ҳуқуқ ва дигар ташкилотҳои ғайриҳукуматӣ дар шароитҳои дур аз таъмини амният фаъолият намуда, бо фишор аз ҷониби ҳукумат дучор шуданд.
