Барои аз қаламрави Ямани бо ҷангу хунрезӣ фарогирифта берун овардани шаҳрвандони худ Тоҷикистон ҳамаҷониба тадбир меандешад.
Роҳбари Раёсати иттилоот, матбуот, таҳлил ва тарҳрезии сиёсати хориҷии ВКХ Тоҷикистон Абдулфайз Атов ба «Азия-Плюс» дар ин робита изҳор намуд, ки айни замон ҷиҳати кӯчонидани шаҳрвандони Тоҷикистон аз шаҳрҳои Санъо ва Аден фарзияҳо ва роҳу воситаҳои гуногун мавриди омӯзишу таҳия қарор доранд.
«Ҳудуди 100 нафар табибони тоҷик, бархе бо аъзои оилаашон бо миёнравии се ширкати русиягӣ ба Яман фиристоода шудаанд ва мо бо намояндагони ин ширкатҳо ҷиҳати хурӯҷи шаҳрвандони Тоҷикистон аз ин кишвар мунтазам дар тамосем», – иброз дошт ӯ.
Номбурда таъкид намуд, ки зимни боздиди сафири Тоҷикистон дар Қатар Ардашер Қодирӣ аз шаҳри Санъо бо ҳукуматдорони ин кишвар масоли таъмини амнияти шаҳрвандони тоҷики муқими ин кишвар, мувофиқасозии тадбирҳои кӯчонидани онҳо дар сурати зарурат ва ҳамчунин мусоидат ба озод кардани табибзани тоҷики гаравгирифта Гулрухсор Рофиева баррасӣ шуданд.
«Зимни мулоқоти А.Қодирӣ бо сафири Русия дар Яман дипломати рус итминон дода буд, ки дар сурат муташанниҷ гардидани вазъ Русия барои аз ин кишвар хориҷ кардани шаҳрвандони Русия ва Тоҷикистон аз ҳавопаймоҳои Кумитаи ҳолатҳои фавқулодаи кишвараш истифода мекунад, зеро Маскав огаҳ аст, ки шаҳрвандони Тоҷикистон ба Яман аз ҷониби ширкатҳои русиягӣ фиристода шудаанд», – қайд карда Атоев.
Намояндаи ВКХ Тоҷикистон изҳори тааасуф намуд, ки шаҳрвандони тоҷики машғул ба кору зиндагӣ дар Яман огаҳиҳои чандинкаратаи ВКХ Тоҷикистонро дар бораи тарк кардани қаламрави ин кишвар ба инобат нагирифтанд.
Ёдрас мекунем, ки шаҳрвандони Тоҷикистон, ки муваққатан дар пойтахти Яман кору зиндагӣ доранд, аз ҳукуматдорони Тоҷикистон
даъват карданд,
ки барои берун шудан аз шаҳри Санъо ва ба ватан баргаштанашон кумак расонанд. Даъватҳои онҳо ҷиҳати кумак дар шабакаҳои иҷтимоӣ нашр шуданд.
