Ба муносибати 137-солагии сардафтари адабиёти муосири тоҷик Садриддин Айнӣ дар Донишгоҳи давлатии омӯзгории Тоҷикистон як қатор чорабиниҳои илмӣ-адабӣ таҳрезӣ гардида, чанде қабл донишҷӯёни ин муассисаи таълимӣ аз Осорхона адабии устод Садриддин Айнӣ боздид намуданд.
Бино ба иттилои сомонаи шабакаи телевизиони «Ҷаҳоннамо», дар рафти боздид масъулини осорхона ба донишҷӯёни ин муассисаи таълимӣ доир ба ҳаёту фаъолият, асарҳои эҷодкарда ва заҳмату талошҳои адибии забардаст дар рушди адабиёти тоҷик сухан гуфта, иштирокчиёнро ба маҳзани илму маърифат бори дигар шинос намуданд.
Тавре қайд карда шуд, осорхонаи адабӣ ба чаҳор толор ҷудо карда шудааст. Дар толори аввали он китобу маҷмӯаҳое, ки доир ба ҳаёту фаъолияти шоир то замони инқилоб ҷамоварӣ гардидаанд, гирдоварӣ шудааст. Дар толори дуюми он асарҳои нашрнамудаи Айнӣ аз солҳои 1920 то 1950, яъне баъд аз замони инқилобӣ ҷой дода шудааст.
Дар толори сеюм маҳсули эҷод намудаи шоир дар солҳои 1951 то 1954 маҳфуз аст. Толори чорум бошад, асарҳои муҳаққиқони дохил ва хориҷ, ки бо забонҳои гуногун дар бораи устод Садриддин Айнӣ эҷод намуданду имрӯз хонандагон аз онҳо васеъ истифода мебаранд, ҷой гирифтааст.
Дар фарҷом донишҷӯёни Донишгоҳи давлатии омӯзгории Тоҷикистон шеърҳоро аз ашъори шоир дар назди ҳозирин қироат намуданд.
