Котиби Шӯрои амнияти Тоҷикистон Абдураҳим Қаҳҳоров дар вохӯрии 10-уми ҳамасолаи котибони Шӯрои амнияти кишварҳои узви Созмони ҳамкории Шанхай, ки имрӯз, 14 апрел дар шаҳри Маскав доир гардид, суханронӣ намуд.
Тавре аз сафорати Тоҷикистон дар Русия иттилоъ доданд, зимни суханронӣ А.Қаҳҳоров таваҷчуҳи ҳозиринро ба масоиили муҳиму рӯзмарраи таъмини амният дар минтақаи кишварҳои СҲШ, мубориза бо қочоқи маводи мухаддир ва ҳамчунин пешгирии ҳолатҳои низоъ дар партави таҳдидҳои нав ҷалб кард.
Котиби Шӯрои амнияти Тоҷикистон қайд кард, ки моҳи майи соли ҷорӣ дар Душанбе оид ба мавзӯи мубориза бо муомилоти ғайриқонунии маводи мухаддир конфронси байнулмилалӣ доир мегардад.
Қобили зикр аст, ки иштирокдорони вохӯрии мазкур масъалаҳои таъмини амният дар паҳнои СҲШ бо назардошти вазъи тағйирёбанда дар минтақаҳои наздики онро мавриди таҳлилу баррасӣ қарор доданд.
Айни замон кишварҳои Русия, Чин, Қазоқистон, Тоҷикистон, Қирғизистон ва Ӯзбекистон аъзои Созмони ҳамкории Шанхай мебошанд. Афғонистон, Ҳиндустон, Эрон ва Муғулистон ба ҳайси кишварҳои нозири Созмон қабул шудаанд.
