Тӯли 7 моҳи соли равон мизони таваррум дар бахши истеъмолии Тоҷикистон ба 2,7 фоиз баробар шуд.
Бино ба маълумоти Бонки миллии Тоҷикистон, моҳи июли соли ҷорӣ нархҳо ба маҳсулот ва хизматгузориҳо ба андозаи 0,1% афзудаанд.
Дар ҳамин ҳол, мизони таваррум дар ифодаи солона (июли соли 2014 – июли соли 2015) дар бахши истеъмолии кишвар 5,5%-ро ташкил додааст.
Қобили зикр аст, ки давоми моҳҳои январ-июли соли гузашта нарху тарифҳо ба мол ва хизматгузориҳо ба андозаи 4,5% афзуда буданд.
Ҳукумати Тоҷикистон ният дорад, ки сатҳи таваррум дар бахши истеъмолии кишвар дар соли 2015-ро дар мизони 7,5% нигоҳ дорад. Мизони таваррум соли 2014 дар бахши истеъмолии Тоҷикистон 7,4%-ро ташкил дод, ки аз сатҳи пешбиникардаи ҳукумат 0,1 банди фоизӣ камтар аст.
Мебояд гуфт, сатҳи таварруми соли 2013 дар ҷумҳурӣ сабтшуда – 3,7% аз ҳама пасттарин дар замони истиқлолияти кишвар мебошад. То ин замон сатҳи нисбатан пасти таваррум соли 2012 ба қайд гирифта шуда буд, ки 6,4%-ро ташкил дода буд.
