Сафири Фавқулода ва Мухтори Ҷумҳурии Тоҷикистон дар Украина Файзулло Холбобоев санаи 17 сентябри соли 2015 дар бинои Қасри Президент ба Президенти Украина Пётр Порошенко Эътимоднома супурд.
Бино ба иттилои Вазорати корҳои хориҷии ҷумҳурӣ, пас аз маросими супоридани Эътимоднома, Президенти Украина Сафири Тоҷикистонро ба ҳузур пазируфта, дар рафти мулоқот масъалаҳои густариши муносибатҳои дуҷониба, таҳкими равобити дӯстона ва ҳамкориҳои минбаъда дар соҳаҳои мухталиф мавриди баррасӣ қарор гирифтанд.
Гуфта мешавад, дар поёни сӯҳбат Сафири Тоҷикистон Файзулло Холбобоев изҳор дошт, ки тамоми саъю кӯшиши худро барои таҳким ва густариши муносибатҳои дуҷонибаи Тоҷикистону Украина ба харҷ хоҳад дод.
Ёдрас мекунем, ки Файзулло Холбобоев санаи 10 август бо фармони президенти мамлакат сафири Тоҷикистон дар Украина таъин шуд. То ба ин мансаб таъин шудан Холбобоев ба ҳайси намояндаи ваколатдори Тоҷикистон дар Комиссия оид ба масоили иқтисодии назди Шӯрои иқтисодии ИДМ ва намояндаи доимии Тоҷикистон дар назди Иттиҳоди иқтисодии Авруосиё фаъолият дошт.
