Аз даъвати тирамоҳӣ ба хизмати ҳатмӣ дар сафи Қувваҳои Мусаллаҳи Тоҷикистон 8 шаҳру навоҳии кишвар мужда расониданд.
Сардори маркази матбуоти Вазорати мудофиаи Тоҷикистон подполковник Фаридун Маҳмадалиев ба «Азия-Плюс» дар ин робита иттилоъ дод, ки то имрӯз нақшаи даъват дар ноҳияҳои Ишкошиму Дарвози ВМКБ, шаҳри Истиқлол, ноҳияҳои Зафарободу Кӯҳистони Мастчоҳи вилояти Суғд, шаҳри Сарбанд, ноҳияҳои Носири Хусрав ва Балҷувони вилояти Хатлон иҷро шудааст.
Ба гуфтаи манбаъ, то рӯзи 12 октябр иҷрои нақшаи даъват дар вилояти Хатлон – 60%, ВМКБ – 69%, вилояти Суғд – 56%, ноҳияҳои тобеи марказ – 36% ва шаҳри Душанбе – 33%-ро ташкил медиҳад.
Ёдрас мекунем, ки мутобиқи фармони президенти кишвар, маъракаи даъвати тирамоҳӣ ба хизмати ҳатмии ҳарбӣ дар сафи Қувваҳои Мусаллаҳи Тоҷикистон 1-уми октябр оғоз гардида, 30 ноябри соли равон ба итмом мерасад. Ба хизмати ҳатмии ҳарбӣ шаҳрвандони синнусоли аз 18 то 27-сола, ки барои мавқуф гузоштани хизмат ё озод шудан аз он ҳуқуқ надоранд, даъват карда мешаванд.
Қобили зикр аст, ки ҳамасола ба хизмат дар сафи Қувваҳои Мусаллаҳи кишвар тақрибан 15-16 ҳазор нафар даъват карда мешаванд. Дар Тоҷикистон зиёда аз 600 ҳазор нафар ҷавонони синнусоли мувофиқ ба хизмати ҳарбӣ ба сар мебаранд, аммо ҳудуди 150 ҳазор нафари онҳо мӯҳлати хизматашонро мавқуф гузоштаанд ё аз хизмат озод карда шудаанд ва ё барои хизмати ҳарбӣ коршоям нестанд. Боз ҳудуди 100 ҳазор нафар шаҳрвандони синнусоли мувофиқ ба хизмати ҳарбии Тоҷикистон дар муҳоҷирати корӣ қарор доранд.
Қувваҳои Мусаллаҳи Тоҷикистон аз се навъи ҷузъу том – Қушӯнҳои зудамал, хушкигард, Қувваҳои ҳарбӣ-ҳавоӣ ва мудофиаи зидди ҳавоӣ иборат аст.
