Зимни амалиёти махсуси кормандони Агентии назорати маводи нашъаовари назди президенти ҶТ дар яке аз қаҳвахонаҳои шаҳри Душанбе, миқдори зиёди маводи нашъаовари синтетикӣ МДМА (экстази) мусодира шуд.
Бино ба иттилои маркази робита бо ҷомеаи Агентӣ, кормандони ин cохтор иттило гирифтанд, ки ба пойтахт миқдори махсусан калони маводи нашъаовари синтетикии МДМА бояд ворид гардад ва як силсила чорабинӣ барои муайян намудани шахсияти ба он дастдошта гузарониданд.
Қарор карда шудааст, ки он шахсро ҳангоми фурӯши ҳабҳо дар яке аз ошхонаҳо дастгир намоянд. Ҳангоми азназаргузаронӣ аз ӯ як борхалта дарёфт гардид, ки дар дохили он 3 ҳазору 587 ҳаби МДМА мавҷуд буд. Пас дар хонаи дастгиршуда кофтуков гузаронида шуд ва дар махфигоҳ боз зиёда аз 2 ҳазор ҳаби МДМА дарёфт гардид.
Дастгиршуда дар тафтишоти пешакӣ нишон дод, ки ҳабҳои МДМА-ро бо мақсади паҳн намудан дар муассисаҳои дилхушии пойтахт овардааст.
Тибқи хулосаи Шуъбаи экспертизаи судии Агентӣ маводи мусодирашуда воситаи нашъаовари синтетикии МДМА – экстази дар ҳаҷми 5 ҳазору 418 ҳаб мебошад. Нархи умумии ҳабҳои мусодирашуда дар “бозори сиёҳ” 80 ҳазор доллари ИИА-ро ташкил менамояд.
Аз рӯи ин ҳодиса аз тарафи Шуъбаи тафтишотии Агентӣ бо моддаи 200 қ. 4 зербанди “д” Кодекси ҷиноятии Ҷумҳурии Тоҷикистон (Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори махсусан калон) парвандаи ҷиноӣ оғоз гардида, дастгиршуда дар тавқифгоҳи муваққатии Агентӣ нигаҳдорӣ мешавад.
