Корхонаи воҳиди давлатии «Хоҷагии манзилию коммуналӣ» (ХМК) аз мақомоти андози ҷумҳурӣ тақрибан 12 млн. сомонӣ қарздор аст.
Роҳбари КВД «Хоҷагии манзилию коммуналӣ» Алимурод Исломзода ба журналистон дар ин робита изҳор намуд, ки ин қарзҳо асосан аз ҳисоби аз ҷониби Вазорати молияи ҷумҳурӣ пардохт нашудани маблағи хизматрасониҳои корхона ба афроди имтиёздор ба вуҷуд омадааст.
Исломзода шарҳ дод, ки мутобиқи қарори ҳукумат, имтиёздороне мавҷуданд, ки танҳо қисмате аз маблағи хизматрасониҳои хоҷагии манзилию коммуналиро пардохт мекунанд ё пурра аз пардохти он озод карда шудаанд. «Маблағи ин хизматрасониҳои пардохтнашударо бояд Вазорати молияи рӯйпӯш намояд, вале Вазорат инро дар ҳаҷми пурра ба иҷро намерасонад», – иброз дошт ӯ.
Зимнан зикр гардид, ки соли гузашта Вазорати молия барои имтиёздорон мебоист тақрибан 6,8 млн. сомонӣ маблағ пардохт мекард, вале дар амал ба суратҳисоби корхона танҳо 2,4 млн. сомонӣ маблағ гузаронида тавонист, ки ҳамагӣ 36% аз ҳаҷми умумиро ташкил медиҳад. «Мақомоти андоз бошад, миқдори хизматрасонии воқеъии моро ба инобат мегирад», – қайд кард ӯ.
Роҳбари корхона ҳамчунин зикр кард, ки дар маҷмӯъ аҳолӣ пурра маблағи хизматрасониҳои хоҷагии манзилию коммуналиро пардохт мекунад.
